xaneiro 20, 2018

Chove pra que eu soñe

Se recoñeces o título deste artigo como o que é, un famoso haiku de Uxío Novoneyra, xa estás en condicións de te lanzares ao 1º Concurso de Haikus en galego do IES da Terra Chá. Con motivo da festa do amor, a Candeloria (2 de febreiro), data na que casan os paxariños, o Equipo de Normalización e Dinamización Lingüística, xuntamente co Departamento de Lingua Galega, veñen de convocalo.

Dirixido a todo o alumnado do centro, cada participante poderá concursar con todos os textos que desexe. Por parte dos convocantes requírese unicamente empregar con carácter obrigatorio a estrutura de haiku, así como facelo arredor do tema do amor, aínda que tamén se poderán tratar as temáticas alusivas á natureza tan propias desta forma poética.

A data final de entrega será o día 8 de febreiro, sempre en man e a calquera membro do profesorado de galego ou do ENDL; farase nun sobre pechado, dentro do que irán os datos persoais que identifiquen á persoa (curso, grupo, nome e apelidos), deixando para a parte de fóra do sobre somente un pseudónimo co que quen escriba se sinta recoñecido. 

Concederase un grande Primeiro Premio, sen prexuízo dos accésit que o xurado considerar. Non se admitirán, obviamente, propostas que incorran en insulto, falta de respecto a persoas ou colectivos, contidos sexistas, obscenos ou xenófobos.

Para sabermos máis:


decembro 31, 2017

Un reto pola igualdade

Velaquí presentamos o resultado da estrea mundial do Proxecto Aleluia no IES da Terra Chá. Trátase dunha idea orixinal do Departamento de Música, dirixido polo profesor Benito Buíde, e conta coa participación de todo o alumnado desa materia. Empregando o mítico tema de Leonard Cohen: Hallelujah, aquí na voz da tamén profesora do centro Elba Cancio, acompañada dos magníficos músicos do IES Terra Chá, conseguen crear un ambiente emocionalmente agradable e suxestivo, onde se nos transmite que a verdadeira igualdade supón valorar as diferenzas.

"O proxecto versa sobre un xogo de mans e cadeiras que simboliza a comunicación entre iguais. Xogamos, facemos música, dámonos a man, ollámonos, comunicámonos cos nosos compañeiros, e facémolo desde o respecto á identidade de quen temos a carón. Todos somos iguais, pero todos somos diferentes. Todos somos iguais, mais cada quen ten os seus talentos que o diferencian dos demais."

Noraboa a todas e todos os participantes e colaboradores, porque sen vós non tería sido posible este reto:



Para sabermos máis:
"Hallelujah" por Leonard Cohen

novembro 25, 2017

Eu si te creo

Somos moitos e moitas os que te cremos. Aos que nos resulta escandaloso como te están a tratar. Como te están outravolta a agredir.

Porque as mulleres agredidas, para probar que foron agredidas, teñen que gardar o loito da agresión. Non se lles ocorra tratar de recuperar a normalidade, ou gozar minimamente de algo, ou sorrir, ou celebrar o seu aniversario, porque entón dubidarán delas. A xustiza patriarcal dubidará sempre delas. A opinión pública dubidará delas.

Síntoo, de verdade.
Sinto que a lei non te protexa con máis coidado por considerar que os feitos que ti denunciaches non son violencia machista. Sinto que te culpen a ti por agredirente.
Xa nada será igual.
Cambiáronche algo para sempre.
Pero o importante non é o que che pasa. É o que ti fas co que che pasa.
E o que vas facer é vivir. Tirar.
E cando te sintas feble. Cando penses por que a min. Cando te enchas de carraxe ou de dor.
Lembra.
Que non estás soa.

Irmá, compañeira, muller.
NON ESTÁS SOA.

[Adaptación dun texto de Roy Galán 
publicado o 15 de novembro de 2017]


O acto contra a violencia de xénero en imaxes:











































novembro 16, 2017

O cancro silencioso

Con motivo do Día Mundial do Cancro de Páncreas, que se celebra hoxe, as organizacións internacionais contra esta doenza únense para concienciar e esixir un diagnóstico precoz, así como para demandar maior investimento económico e vontade investigadora por parte das institucións responsables e dos poderes políticos. Cada día diagnostícanse 1000 novos casos de cancro de páncreas no mundo. Estímase que 985 deses pacientes han morrer por mor da enfermidade, nada menos que o 98,5%!

O cancro de páncreas é tamén coñecido como o cancro silencioso, pola ausencia de síntomas significativos até estadíos moi avanzados, o que supón que moitas das persoas diagnosticadas non superan o ano tralo diagnóstico, sendo o índice de supervivencia a 5 anos de un escaso 3%. 

Precísase un maior investimento en investigación para poder entender mellor os mecanismos de expansión desta doenza, así como para o desenvolvemento de programas de detección precoz. En canto aos factores que inflúen neste tumor, ademáis da compoñente xenética ou a obesidade, a Asociación Española do Cancro de Páncreas sinala que alomenos un 25% dos pacientes de cancro de páncreas son ou foron fumadores durante moito tempo. 

Agora deixémonos de cifras e botemos unha ollada ao noso arredor: coñecemos persoas que padecen ou padeceron algún tipo de tumor? Seguro que a pregunta non é difícil de responder... Hoxe vai polos enfermos do cancro de páncreas, polos que pelexaron pero non puideron seguir con nós, polos que están facendo fronte agora mesmo ao peor dos prognósticos…  

Polos nosos seres queridos, polo noso futuro, é hora de cambiar as cousas.
Consideramos imprescindible unha maior taxa de supervivencia xa!

[Silvia Calvo Iglesias]

Para sabermos máis:

novembro 12, 2017

Futuro sustentable

En outubro os alumnos e alumnas de 4º de ESO tivemos unhas intensas e produtivas charlas sobre iniciativas emprendedoras, ofertadas desde a Deputación de Lugo. As charlas culminaron o día 26 cunha visita a tres das empresas ecolóxicas da provincia, onde atopamos persoas realmente loitadoras e emprendedoras. 

Aprendendo do exemplo
Visitamos en primeiro lugar a Sociedade Cooperativa Milhulloa e alí puidemos saborear unha infusión de melisa ecolóxica. Estivemos tamén na Granxa A Cernada, de lácteos ecolóxicos, con vacas tamén ecolóxicas. Rematamos o día na aldea ecoagroturística de Arqueixal, de novo na Ulloa, onde se elaboran, entre outros produtos, iougures e queixos deliciosos.

Velaquí unha xornada intensa, divertida e interesante, que nos vén demostrar que un medio rural e agrario sustentables, tanto desde o punto de vista ecolóxico como económico e social, son posibles e necesarios.