xuño 22, 2023

Lois Pérez e A gruta da torre

 A mediados do mes de maio visitou o noso centro Lois Pérez, autor da novela A gruta da torre, que é lectura obrigatoria do alumnado de 1º de ESO. Os protagonistas desta novela son tamén  adolescentes dunha idade similar e Lois á parte de desvelar algúns "segredos" desta historia e cal foio motivo e data da  súa escritura, contoulles como era o verán deses adolescentes nos anos noventa  nunha vila mariñeira  como é Ribadeo, espazo no que se desenvolve .
 

De ruta por Ribadeo. En busca de lugares e segredos de A gruta da torre

 
O 21 de xuño, aproveitando a proximidade do noso centro a Ribadeo e como actividade de  remate deste curso  algunhas profesoras do EDL e do Equipo da Biblioteca achegámonos  cos rapaces e rapazas de      1º ESO  a esa vila. Partimos da Torre dos Moreno (lástima que estea con andamios e rede en espera de restauración), lugar de onde  partiría ese pasadizo  que vai ata o porto de Porcillán e que teimaban atopar os membros  da cuadrilla. Fixemos o percorrido  pola Praza de Abaixo, a Fonte dos Catro Canos, baixamos pola rúa O Vello Pancho e  chegamos ao Porto de Porcillán e despois seguimos ata a zona de  Cabanela tomando con grande interese de dar con esa entrada  do citado pasadizo. De aquí xa tomamos camiño do Cargadoiro e ver o Faro na Illa Pancha. 

 







 

                                                

       BO VERÁN,  FELICES VACACIÓNS!


xuño 20, 2023

Conci-coloquio co Rabelo

 O 19 de xuño  desenvolveuse o obradoiro "Bótalle unhas pezas co Rabelo". Xanhe Redondo, coñecido artisticamente como “ O Rabelo”, desenvolveu o tema “Normalización lingüística e autoestima cultural”.

 Foi unha mestura de faladoiro e concerto. O artista formulou varias preguntas como que é a cultura?, que é a cultura galega?, por que se coñece máis o de fóra que o noso?, por que abandonamos a lingua dos nosos maiores?,etc  E o alumnado tiña uns minutos para debater en grupo e despois a posta en común e a seguir  interpretación de pezas diversas, entre elas un cantar da vendima, a Rumba do pan, Palmira.... .      E pedindo ao alumnado que deran nomes de artistas, cantantes ou grupos de música galegos, valeu para comentarlles nomes de artistas que están triunfando fóra do panorama galego e descoñecidos para a nosa rapazada.                    

 El lembrou os ritmos tradicionais, a música da creación colectiva que se fai en seráns, ruadas...vinculouno coa mitoloxía tradicional galega, cuestións de xénero.... Interpretou varias pezas , ben tradicionais  ou rap,  reguetón e música de raíz.

 

  A actividade resultou sorprendente, fixo que os rapaces  sentisen curiosidade pola música que el fai e teñan un recoñecemento da importancia do lugar onde viven, tomen conciencia do moito que  nos transmitiron tantas xeracións e como mesmo podemos transformalo sen perder a esencia.                          

 

                   

maio 04, 2023

Charla-coloquio con Andrea Maceiras


 
   O alumnado de 3º ESO tiña como lectura obrigatoria O que sei do silencio e tivemos  a     sorte de contar  presencialmente coa autora, ao inicio do mes de maio, algo que sorprendeu e agradeceron os rapaces e rapazas, debido ás restricións  que sufrimos case ata agora.        

A actividade valeu para coñecer o traballo da autora, a súa planificación antes de escribir cada obra, facer preguntas sobre a lectura que estaban a  facer, que recapacitasen sobre o tema desta novela, a actuación dos protagonistas e outras curiosidades.                            

 Gustaron especialmente de como iniciou o coloquio coa lectura interpretativa dun conto. Mesmo lles fixo pensar as preguntas formuladas por Andrea de se lles tiñan contado contos ou do tempo que había que non escoitaban un conto.


 O alumnado salientou da autora a súa amabilidade, claridade nas respostas, desexo de responder a todas as preguntas.   E moitos deles achegáronse co seu libro, ao final da actividade, para ter unha fermosa dedicatoria da autora. Moitas grazas Andrea!




 

abril 27, 2023




Visítannos as nenas e nenos de 3º e 4º de Primaria do Colexio Veleiro Docampo

                 


 Recibimos a estas nenas e nenos de 3º e 4º de Primaria do Colexio Veleiro Docampo agardando en datas próximas sermos nós os que vaiamos  de visita e compartir así actividades que estamos a desenvolver.           Gozamos coa mostra de regueifas e cantigas que compuxeron coa axuda das súas titoras co motivo do día de Rosalía e recreando algunha  recollida da tradición oral.     

          Parabéns polo traballo realizado!

Os nosos alumnos correspondéronos coa lectura dalgúns  relatos elaborados, por grupos, na materia de Lingua Galega  a partir da lectura sobre a figura do Gatipedro, animal mitolóxico galego ao que se referiu Álvaro Cunqueiro en Escola de Menciñeiros.