Observatorio

Desde o IES de Rodeira, en Cangas do Morrazo, chéganos este interesante Blog nacido dunha curiosa idea: "ir transformando o terreo detrás do pavillón do Instituto nun espazo (re)creativo, que sirva para nos conectar cos procesos de cambio que acontecen ao noso arredor".

Chámanlle a este espazo Observatorio, porque comezou sendo o sitio ao que saían á noitiña a observar planetas e constelacións, aínda que, ben mirado, á luz do día tamén serve para observar. Observar o paso das nubes ou a transformación das sombras ao longo do día e ao largo das estacións, a vexetación e a fauna, o ciclo das sementes..., en definitiva, todo o que medra e vai desaparecendo para transformarse.

De paso, din, fanse máis conscientes da paisaxe rural e urbana que os arrodea: os xardíns, as hortas, as construcións, os espazos ermos, a praia, a ría, o horizonte, o mar. En fin, un lugar para a meditación, a fotografía, o debuxo, o apuntamento, pero tamén o labor (sementar, plantar, regar...), a reciclaxe, a compostaxe, o diálogo con esa natureza coa que, case sempre, vivimos de costas viradas. 

Tamén nós, desde lonxe, e sen as vistas do mar de Vigo diante da porta, poderemos aprender do que fan estes cangueses observadores. O blog contén manuais, roteiros, atlas xeobotánicos, catálogos de herbas medicinais e unha morea de datos e consellos para non se perder nisto do horteiro escolar.