Desde a centuria de 1500, como sabemos, o galego viuse desprazado da escrita.
Unha das consecuencias foi que, de maneira máis ou menos consciente, os
nomes propios, topónimos e antropónimos, comezaron a ser
modificados e asimilados ao castelán. Cara a finais desa centuria iniciouse a práctica dos rexistros escritos (primeiro os relixiosos, desde o Concilio de Trento, e despois
os civís), o que lle deu carta de natureza aos erros e depurpacións de nomes, apelidos e topónimos.
Dado que os nomes van cambiando de xeración en xeración, os antigos nomes de pía que aparecían acotío nos documentos medievais (Afonso, Lopo, Nicolao, Johán, Einés, Moor, Mariña, Esteveíña, Tereixa, Xemena…),
foron sendo substituídos polas novas devocións propugnadas pola Igrexa
católica. Aqueles que se mantiveron empezáronse a impoñer na súa forma
castelá. Así que o corpus dos nomes propios pasou a consignarse de
maneira case exclusiva en castelán.
Mais cos apelidos, que xa eran hereditarios, non sucedeu o mesmo. En
realidade, modificalos ou respectalos dependía en boa medida da vontade
do escribente: algúns sufriron un maior proceso de deturpación
ca outros, e non hai constancia de que acontecera de maneira
significativamente diferente nunhas áreas ou noutras.
Como esta parte da onomástica persoal non pode ser regulada polo
dereito público, pois pertence ao dereito privado, han ser os propios
particulares os que procedan á restitución dos seus apelidos ou á
recuperación dos seus nomes propios. A Real Academia Galega
acaba de publicar un repertorio de 1500 apelidos coa súa forma xenuína
galega, que facilita que poidas recuperar administrativamente o teu nome
familiar. Feixoo, Hedreira, Ermida, Monteiro, Reixa, Seixo, Vale, Vilamarín, Sanxurxo ou Xegunde, son formas propias que temos dereito a recuperar. Agora a Xunta difundirá este libro e entregarao en cada rexistro civil para que sexa publicación oficial de consulta.
Para sabermos máis:
Apelidos de Galicia Información de máis de 5.000 apelidos.
Cartografía dos apelidos de Galicia Máis de 9.000 apelidos con base no censo de 2001.
INE Apelidos e nomes máis frecuentes en España.
Na Galipedia: Antroponimia , Apelido
IGE Distribución municipal dos apelido.
Mesa pola Normalización (MNL) A caixa dos apelidos.
Ningún comentario:
Publicar un comentario
Que o blog estea vivo, depende de ti. Lembra: escribe ben, manteno limpo, mellórao coa túa aportación. Participa e fainos diferentes!
En Comentar como..., selecciona: "Nome/URL". Pon o teu nome, e deixa en branco o espazo de URL. Así todos saberemos quen somos!