Desconfiarei

    ...sempre de quen non respecte a miña lingua. Porque, ao facelo, demostra que non me respecta a min, e ao tempo tamén demostra que non respecta un ben cultural esencial. 

Desconfiarei sempre de quen non considere normal o seu uso institucional e simbólico porque non considera normal a miña realidade cultural e porque ademais pensa que ten dereito a decidir o que é a normalidade, e curiosamente a normalidade é el, e non eu. 

Desconfiarei sempre de quen diga que o meu problema non é real porque me fai de menos e porque pensa ter o poder de decidir o que é real, e casualmente tamén o é el, e non eu. 

Desconfiarei sempre de quen diga que as linguas son para entenderse e non para crear problemas e utiliza este argumento para crear problemas coas linguas. 

Desconfiarei sempre de quen manipule realidades deliberadamente e ouse acusar as lingua perseguidas de seren as perseguidoras. 

Desconfiarei sempre de quen vexa como un gasto innecesario a promoción da miña lingua e como un investimento imprescindible a promoción da súa. 

Desconfiarei sempre de quen queira acomplexarme porque falo con naturalidade a lingua dos meus pais. 

Desconfiarei sempre de quen me negue a lingua, porque me sinto comprometido cos que a salvaron para que eu llela poida aprender aos meus fillos. 

E procurarei enfadarme pouco, só cando me pareza normal e diante de ameazas que considere reais. E sempre, pero sempre, plantarei cara.

Carles CAPDEVILA, director do xornal catalán Ara 
 Tradución ao galego do artigo "Gent normal i problemes reals" (19-01-2011)
A este texto déuselle lectura pública no acto reivindicativo organizado por Queremos Galego este 17 de Maio en Lugo