"Mariña Folgueira" de Redacción Xornalística

I Certame de Redacción Xornalística "Mariña Folgueira"

A Asociación de Veciños da parroquia de Reigosa (A Pastoriza), lanza este premio co obxectivo de fomentar e difundir a memoria da desaparecida veciña e xornalista reigosina. De feito, a súa convocatoria fora anunciada xa o pasado verán, coincidindo co 3º aniversario do pasamento de Mariña Folgueira Portela, quen traballou en RNE en Galicia e dirixiu o Gabinete de Comunicación do Parlamento de Galicia.

Trátase de un premio dirixido ao alumnado de Primaria e Secundaria que quere incentivar o interese dos escolares por contar historias da comarca chairega a través da redacción xornalística e en galego.

Os centros escolares poderanse inscribir até o 30 de abril e poderán enviar os traballos que consideren, sempre e cando sexa un por autor. Pola súa banda, a data final de recepción dos textos rematará o 25 de xuño. Os artigos deberán constar de entre 3-8 páxinas numeradas, nun documento de texto formato DIN-A4 a espazo simple, con letra tipo times new roman, tamaño 12 e xustificada a ambas as marxes. O enderezo-e para recibir os orixinais é reigosa.asociacion@gmail.com, ou ben por correo ordinario á devandita Asociación (Igrexa, 8. Reigosa, 27287. A Pastoriza). O xurado –formado por un escritor, un xornalista, un profesor de literatura, un crítico literario e un persoeiro relacionado cos medios de comunicación- emitirá o seu fallo o 3 de agosto e terá en conta criterios de pertinencia da temática e de riqueza léxica, así coma o uso de recursos literarios e técnicas da redacción xornalística, coherencia gramatical, corrección lingüística e orixinalidade. 

Haberá un primeiro premio para Educación Primaria e outro para Secundaria, que consistirán en lotes de libros en galego e unha escultura de Luís Loureira. Farase tamén un recoñecemento aos propios centros escolares gañadores así como ao labor do profesorado impulsor.

Bases do I Premio de Redacción Xornalística Mariña Folgueira