Maio en Galego

En chegando Maio multiplícanse as iniciativas desde distintos ámbitos do ensino e da cultura para promoveren o uso da lingua galega. O videoclip que onte publicou en Youtube o IES As Barxas, de Moaña, enmárcase nunha destas accións que pretenden servir para concienciar á mocidade da importancia de defendermos, e sobre todo, de empregarmos a lingua propia de Galicia. Os problemas de transmisión da nosa lingua ás novas xeracións explican o alarmante descenso no emprego do galego que reflicten as cifras oficiais. Iniciativas como as deste alumnado serán cada vez máis necesarias.

Velaquí as palabras do xornal Faro de Vigo informándonos do último vídeo da rapazada d'As Barxas colgado na rede. A ritmo de hip hop e co título de "Queremos Galego", esta iniciativa quere dinamizar o uso do galego entre a mocidade. Uns 40 alumnos do centro cantan e bailan con letras como esta: "Nin teño malicia, nin teño preguiza. Eu vou de misión, Comandante da Lingua" ou "É de xustiza dicir o que pasa; contar as verdades directas e francas; hai quen non quere que fales galego; non queren que fales na fala que falas". 

A letra está composta polo alumno MC Jeremías xunto co profesor Seso Durán. O baile, pola súa banda, é cousa das alumnas e alumnos de 4º de ESO. María Cancelas e Aitana Sanz encargáronse da dirección, e a peza conta tamén con toques de saxofón a cargo de Lía Fernández. O videoclip remata cos títulos de crédito e un pequeno making off. A peza audiovisual enviarana a distintos certames como o concurso Videoghit ou a edición deste ano do Festival Audiovisual Escolar Olloboi.