Bulindo pola lingua

Botamos unha ollada atrás, ao curso que rematou, e imos lembrar algunhas das actividades organizadas por este ENDL, equipo de alumnado e profesorado do centro que este ano buliu canto puido. Para facermos esta entrada contamos coa inestimable axuda de Candela R. Otero e Alba Sinde.

↪O 25 de abril recibimos no noso centro a visita de Carmen Conde, a quen podemos describir como unha poeta moderna. Con ela realizamos un obradoiro de poesía e sacamos o noso poeta interior. Para introducirnos na poesía púxonos uns vídeos inspiradores, un deles era o poema musicado de A xustiza pola man (Rosalía, por Aid); outro deles era Deitado frente ao mar (Celso Emilio por García Mc). Para acabar de sacar a nosa vea poética, ensinounos 40 fotografías moi variadas para nós quedarmos con aquelas que nos transmitisen algo e nos servisen de base para as nosas propias composicións.

Desde o punto de vista particular, o taller fíxonos sacar o noso lado poético máis escondido. A verdade é que esta actividade é moi recomendable para calquera persoa, xa que permite expresar os sentimentos máis internos dunha maneira fermosa e dun xeito que nunca coidarías posible. Desexariamos repetir moitas veces, incluso durante máis tempo. Sen dúbida un dos mellores momentos foi cando aceptou recitarnos un poema, Carme Conde é unha persoa incríbel, tanto a nivel artístico como persoal. Ogallá poidamos gozar dela de novo outra vez. 

O galego é a fórmula! Nós somos o elemento!. O galego é o noso símbolo! Temos química coa nosa  lingua!

↪Neste ano celebramos a XIX edición de Correlingua co lema O galego é a fómula, facendo referencia á ciencia, coincidindo cos 150 anos da creación da táboa periódica dos elementos químicos por parte do ruso Mendeleiev. Centrouse a atención na necesidade de que o galego estea presente en todas as materias do ensino, tamén nas do ámbito científico. En Lugo, o 8 de maio, xuntáronse 1200 rapaces e rapazas de primaria e secundaria nun acto presentado por Luís o Caruncho, dándonos a benvida na praza de Santa María antes de facermos o percorrido pola Muralla. O alumnado de 1º ESO do Terra Chá leu para todos os asistentes o Manifesto gañador desta edición: "temos química coa nosa lingua". 

A continuación o grupo gañador do certame de vídeo na categoría infantil e primaria, do CEIP de Albeiros (Lugo), fixo a súa representación e seguidamente foron entregados diplomas e agasallos aos centros participantes e tamén para as tres mellores pancartas. Pechouse o acto cantando e bailando co grupo musical Monoulios DOP. 

↪En marzo, o día 28, e en colaboración co departamento de Filosofía, emprendemos viaxe a Santiago de Compostela e Padrón, co alumnado de 1º de Bacharelato. Visitamos unha exposición sobre nada menos que... fútbol!, "Valor e Mestría, Galicia como fútbol", que nos deixou favorablemente sorprendidos. A mostra arranca en 1876, ano no que se data a primeira referencia ao xogo do foot-ball en Galicia, e chega até o gol do celtista Iago Aspas no Mundial de Rusia de 2018.

Tamén nos pasamos polo Parlamento galego, a chamada casa de todas e todos, e finalmente desprazámonos até Padrón para a visita á casa-museo de Rosalía de Castro. Velaquí algunhas fotos dese día. 

O fútbol visto doutro xeito ten o seu aquel

Algúns escoitan atentamente os poemas, mentres se protexen do sol de marzo, que quenta máis có de xullo

Na Casa de Rosalía, lendo con atención algúns dos seus poemas

Quen se atreve a ocupar a tribuna de oradores?

E así fomos rematando o curso 2018-19. O ano vindeiro, máis e mellor. Saúde!