Se es pai ou nai, se tés 18 anos: le e comenta

CLUBE DE LECTURA:

O AUTOR: Jim Thompson (1906-1977) 

Novelista, xornalista e guionista norteamericano, con pouca transcendencia no circuíto da novela negra do seu tempo foi, porén, reivindicado máis tarde, cando se descubriu a depurada técnica narrativa e xornalística da súa obra, o seu elevado valor literario, a habilidade para retratar psicolóxica, social e moralmente ao ser humano, a súa capacidade innovadora e a forza das súas personaxes. Suso de Toro, Diego Ameixeiras ou Manuel Rivas manifestaron algunha vez a súa admiración polo traballo de Thompson, que tamén expresa o malestar existencial do ser humano.

A OBRA: Rinoceronte Editora, 238 páxs, ano 2012. (Trad. do Inglés de Eva Almazán)

Ambientada no Sur profundo dos Estados Unidos en 1917, o ano da Revolución Rusa, presenta unha historia narrada en primeira persoa polo seu protagonista, o shériff Nick Corey, que nos relata os seus valores e modo de vida: mirar para outro lado e non intervir; máis que impoñer a lei interésalle durmir, vivir tranquilo e sacar uns cartiños en subornos. O malo é que sempre hai quen porfía en complicarlle a vida: a harpía da súa Muller, o cuñado deficiente mental, as dúas amantes... As cousas vanse complicando e Corey non deixa de enredalas aínda máis polo parvo e acomplexado que é... ou faise? Un libro impactante, que non deixa indiferente, porque non todo é o que parece en Pottsville.

Existe unha versión cinematográfica, adaptada á realidade colonial francesa: Coup de Torchon (Bertrand Tavernier, 1981). Dobrada ao português como A Lei de Quem Tem o Poder e ao castelán como 1280 Almas.

Tamén existe desde 2013 a versión en banda deseñada, obra maxistral no seu xénero, animada polo célebre creador da serie policíaca Torpedo 1936, Jordi Bernet, e editada por Libros del Zorro Rojo.

Así pois, ánimo coa lectura da obra e, para falar sobre ela, quedamos o Mércores 14 de Maio ás 11:30 horas no IES da Terra Chá!